முழு இலங்கையிலும் அரசியல் பேசு பொருளாக மாறியுள்ள (ஜெயசிறில், கருணா)


தற்போது நாட்டில் கொரோனா அச்சம் நீங்கி எதிர்வரும் எட்டாம் மாதம் 05ம் திகதி பொதுத்தேர்தல் நடத்த தேர்தல் ஆணைக்குழு தீர்மானித்துள்ளது.

இந் நிலையில் நாடு முழுவதும் பதிவு செய்யப்பட்ட பிரதான கட்சிகள் உள்ளிட்ட சுயேட்சை குழுக்கள் சுகாதார நடைமுறைக்கு அமைவாகவும் தேர்தல் கட்டுப்பாடுகளை ஏற்றுக் கொண்டு தங்களது பிரச்சார நடவடிக்கைகளை ஆரம்பித்துள்ளன.

இந் நிலையில் திகாமடுல்ல தேர்தல் தொகுதியின் தற்போதைய தேர்தல் நிலவரத்தின் அடிப்படையில்  மிகக் கடுமையான பிரச்சாரங்கள் நிலவுகின்றது.

அம்பாறை காரைதீவு பிரதேச சபை தவிசாளர் கிருஷ்ணபிள்ளை ஜெயசிறில் கடந்த சில தினங்களுக்கு முன்னதாக ஊடகங்களுக்கு கருத்து தெரிவிக்கின்றபோது “கருணா கொரோனாவை விட கொடியவர்” என தெரிவித்திருந்தார்.

இந் நிலையில் இதற்கு பதிலடி கொடுக்கும் வகையில் கருணா  அம்மான் தனது தேர்தல் பரப்புரையின் போது ஊடகங்களுக்கு கருத்து தெரிவிக்கையில் “ நான் கொரோனாவை விட கொடியவன் என்று காரைதீவு தவிசாளர் கூறியிருக்கின்றார் ஆம் நான் கொரோனாவை விட கொடியவன்தான் போர்காலத்தின் போது ஆயிரக்கணக்கில் இராணுவங்களை கொன்றோம்” என்று கூறியிருந்தார்.

இவர் கூறிய இக் கருத்தானது கட்சி பேதங்கள் இன்றி அனைத்து தரப்பினரானும் முழு இலங்கையிலும் ஒரு அரசியல் பேசு பொருளாக மாறியிருக்கின்றமை குறிப்பிடத்தக்கது.

இந் நிலையில் காரைதீவு பிரதேச சபை தவிசாளர்  “கருணா கொரோனாவை விட கொடியவர்” என  அறிக்கை விட்டமையே இவ்வாறு முழு இலங்கையிலும் குறித்த விடையம் ஒரு அரசியல் பேசு பொருளாக மாறியுள்ளமை குறிப்பிடத்தக்கது.

இந் நிலையில் சஜித் பிறேமதாச உள்ளிட்ட அரசியல்வாதிகள் மத்தியில் கருணா அம்மான் தெரிவித்த கருத்துக்கு எதிர்ப்பு கிளம்பியுள்ளது.

சமூக வலைத்தளங்களிலும் இது விமர்சிக்கப்பட்டு வருகின்றமை குறிப்பிடத்தக்கது.

தவிசாளர் ஜெயசிறில்  வழங்கிய  ஊடக அறிக்கை பின்வருமாறு

சுமந்திரன் அரசியலில் நேர்சரி (அரிவரி) படிக்கின்றவர்: அவருக்கு ஆளுமை இல்லை: பட்டாசு கொழுத்திப்போட்டால் மாரடைப்பால் செத்திடுவார்' என்றெல்லாம் சிறுபிள்ளைத்தனமாக வாய்க்குவந்தமாதிரி பேசுகின்ற கருணா மனிதவர்க்கத்தை அழிக்கும் கொரோனாவைவிட கொடியவராவார்.

இவ்வாறு த.தே.கூட்டமைப்பின் அம்பாறை மாவட்ட முக்கியஸ்தரும் காரைதீவு பிரதேசசபைத்தவிசாளருமான கிருஸ்ணபிள்ளை ஜெயசிறில் கூறியுள்ளார்.

அண்மையில் த.தே.கூட்டமைப்பின் ஊடகப்பேச்சாளர் எம்.எ.சுமந்திரனுக்கு எதிராக கருணா எனஅழைக்கப்படும் முன்னாள் பிரதியமைச்சர் வி.முரளிதரன் காரைதீவில் ஊடகஙகளுக்கு தெரிவித்த விமர்சனத்திற்கு பதிலளித்து மேற்கண்டவாறு தெரிவித்தார்.

எதிரியாக இருந்தாலும் துரோகியாக இருந்தாலும் விமர்சனம் எப்போதும் ஆரோக்கியமாக நாகரீகமாக இருக்கவேண்டும். ஆனால் கருணாவின் விமர்சனம் வேடிக்கையாகவிருக்கிறது.
உலகமே சுமந்திரனின் ஆளுமைகண்டு வியக்கிறது. இலங்கை அரசாங்கம் இன்று த.தே.கூட்டமைப்பிற்கு மதிப்பளிப்பதற்கும் அச்சப்படுவதற்கும் ஒரு காரணியாக விளங்குபவர் திரு.சுமந்திரன்.

மரத்துக்கு மரம் தாவும் பறவைகள் போல இனி மாறுவதற்கு கட்சியே இல்லையென்ற ஒரு கோஸ்டிக்குப் பின்னால் திடீர் சுடலைஞான அக்கறைவந்து அம்பாறையில் களமிறங்கியுள்ள கருணா த.தே.கூட்டமைப்பை விமர்சித்தால் மக்கள் வாக்களிப்பர் என எண்ணி இப்படியான சிறுபிள்ளைத்தனமாக கருத்துகளை வெளியிடுகிறார்.

அரசியலூடாக அபிவிருத்தி என்றால் அது எந்த இடைத்தரகரும்; இல்லாமல் நேராக அரசுடன் இணைந்து அல்லது ஆதரவளித்து முன்னெடுக்கமுடியும். இங்கு பல இடைத்தரகர்கள் காட்டியும் கூட்டியும் கொடுத்துத்திரிகிறார்கள். சம்பந்தப்பட்டவர்கள் இந்தப்புனித மண்ணில் அத்தகைய ஈனச்செயலை நிறுத்திக்கொள்ளவேண்டும்.

பிரதியமைச்சராக அல்லது கூ.கட்சியின் உபதலைவராக இருக்கின்றபோது கல்முனை தமிழ்ப்பிரதேசசெயலக தரமுயர்த்தல் உட்பட அம்பாறை மாவட்ட தமிழர் தேவைகளை பூர்த்திசெய்யாத அல்லது அதைப்பற்றிச்சிந்திக்காத கருணாவிற்கு தற்போதுமட்டும் எங்கிருந்து இந்த சுடலைஞானம் வந்தது? மட்டக்களப்பில் முடியாததை அம்பாறையில் முடிக்கலாமென பகற்கனவு காண்கிறார். அது ஒருபோதும் முடியாது.

காரைதீவு மண் புனித மண். இதனை மாற்றானுக்கு விற்பதற்காக சில பிரகிருதிகள் அற்பசலுகைக்கும் பணத்திற்குமாக பேயாய் அலைகின்றனர். எமக்கான உரிமையை நாமே கேட்டுப்பெறவேண்டுமே தவிர ஏனைய இன அரசியல்வாதிகள் அதனைத்தங்கத்தட்டில் வைத்துத்தரப்போவதில்லை. ஆனால் எம்மவர் சிலர் பணத்திற்காக தேர்தல்கால கடைகளை நடுஊருக்குள் விரிக்கத்தொடங்கியுள்ளனர். காரைதீவு மக்களுக்கு இதெல்லாம் அத்துபடி. அனைத்தையும் அறிவார்கள்.

சமுகத்தில் செய்யக்கூடாததைச்செய்து முகவரி இழந்தவர்கள் மற்றும் முகவரி இல்லாதவர்கள் சேர்ந்து மனக்கோட்டை கட்டுகிறார்கள். அதுஒருபோதும் சரிவரப்போவதில்லை. வீரப்போராட்டத்தை சிதைத்த வரலாறு அவருக்கிருப்பதுபோல அம்பாறைத்தமிழர்களின் இருப்பை அழித்த வரலாறு அவருடன் இணைந்தவர்க்கு வரக்கூடாது என்தே எனது எதிர்பார்ப்பு ஆகும்.

இந்த நாட்டில் தமிழ்பேசும் மக்களது உரிமைகள் பற்றி தேர்தல் காலத்தில் மட்டுமல்லாது என்றும் பேசிவருவது தமிழ்த்தேசியக்கூட்டமைப்பு மாத்திரமே. எனவேதான் தமிழ்மக்கள் தமதுஏகப்பிரதிநிதிகளாக எம்மை தொடர்ந்து ஆதரித்துவருகின்றனர்.

அம்பாறையில் எத்தனை கருணா கேட்டாலும் எமது பிரதிநிதித்துவம் பறிபோகாது. அம்பாறைதமிழ்மக்கள் பட்டறிவு படைத்தவர்கள். அம்பாறை மாவட்ட தமிழ்பிரதிநிதித்துவம் நிச்சயம் காப்பாற்றப்படும்.அதுவும் எமது த.தே.கூட்டமைப்பினூடாகவே பெறப்படும் என்பதை தேர்தலுக்கு 50நாட்களுக்கு முன்னராகவே கூறுகிறேன். யாரும் குறித்துக்கொள்ளலாம்.

அரசியலுக்காக எதையும் பேசலாமென எண்ணக்கூடாது.சுமந்திரனை விமர்சிப்பதற்கு அவருக்கு என்ன தகுதி இருக்கிறது? இனியாவது எதிராளியை நாகரீகமாக ஆரோக்கியமாக விமர்சிக்க அவர் பழகிக்கொள்ளவேண்டும். என்றார்.

No comments: